Seoladh 'An Billiúnaí Beag' (Billionaire Boy) 7.3.17

Tá Futa Fata ag súil go mór Seachtain na Gaeilge a cheiliúradh le seoladh An Billiúnaí Beag le David Walliams, aistrithe ag Máirín Ní Mhárta, ag ocáid speisialta i siopa leabhar Eason, Sr. Uí Chonaill. Inár gcuideachta ar an lá beidh aoíanna speisialta ó Ghaelscoil Bhrian Bóroimhe agus tá muid ag súil go mór le maidin spraíúil a chaitheamh in éindí leo. Ar ndóigh beidh fáilte mhór freisin roimh léitheoirí ar bith eile a bhfuil suim acu a theacht ar an lá.

An Leabhar: Beidh na deora (idir chaoineadh agus gháire) le léitheoirí óga agus scéal Joe Práta á léamh acu. Leaid óg dhá bhliain déag d’aois é Joe agus tá sé lofa le hairgead.  Tá na milliún agus na trilliúin euro ag Joe. Tá teilífiseán plasma 100 orlach i ngach seomra sa teach aige, tá ráschúrsa grand prix ar chúl an tí aige, níl sé gann ar thada, ach rud amháin: cara….

An tÚdar: Tá aithne ag formhór daoine air mar pearsa mór teilifíse ach tá David Walliams ag scríobh agus ag foilsiú leabhair do pháistí ón mbliain 2008 i leith.  Foilsíodh Billionaire Boy i 2010 agus tá sé ar fáil anois i mbreis agus 46 teanga ar fud an domhain.

An tAistritheoir: Is é An Billiúnaí Beag an 7ú leabhar atá aistrithe ag Máirín Ní Mhárta do Futa Fata le cúpla bliain anuas. I measc na n-úrscéalta atá aistrithe aici tá Diary of a Wimpy Kid le Jeff Kinney. Tá dhá leabhar ón tsraith sin ar fáil anois i nGaeilge a bhuíochas do Mháirín; Dialann Dúradáin agus Dialann Dúradain; Rodrick Abú. Faoi láthair, tá sí ag obair ar leagan Gaeilge den triú leabhar, Barr ar an Donas.

Gabhann Futa Fata buíochas le COGG, An Chomhairle um Oideachas Gaeltachta agus Gaelscolaíochta a thacaigh le foilsiú an leabhair seo.

 

 Cóipcheart Seán Ó Mainín

   

image
image